လေးမျက်နှာဘုရားဟာ ပုဂံမြို့ အရှေ့တောင်ဖက်ရှိ မင်းနန်သူရွာအနီးမှာ တည်ရှိပါတယ်။ ဒီဘုရားမှာ ဝင်ပေါက် လေးပေါက် ရှိပါတယ်။ အရှေ့ဖက်ဝင်ပေါက်က ဘုရားထဲကို ဝင်တဲ့ ပင်မဝင်ပေါက် ဖြစ်ပါတယ်။အရှေ့ဖက်ကနေ ဘုရားထဲကို ဝင်လာခဲ့ရင် ကြီးမားတဲ့ ဗုဒ္ဓဆင်းတုတော် လေးဆူကို တွေ့ရမှာ ဖြစ်ပါတယ်။

ဘုရားနံရံတွေပေါ်မှာလည်း ဗုဒ္ဓပုံတော် အမြောက်အမြားကို တွေ့ရပါမယ်။ ဗုဒ္ဓအဖြစ် မရောက်မီ ဘုရားအလောင်းတော်ရဲ့ ၅၅၀ သော ဘဝဘဝတွေကို နံရံတွေပေါ်မှာ အနုပညာမြောက်စွာ ရေးချယ်ထားပါတယ်။

ပစ္စယံ ထောင့်လေးထောင့်တိုင်းမှာ စေတီငယ်တွေ ရံပြီး တည်ထားပါတယ်။ တချိန်တုန်းကတော့ ဘုရားနံရံတွေပေါ်မှာ ဆေးရေးပန်းချီတွေ ရှိခဲ့ပေမယ့် နောက်ပေါ်အလှူရှင်တွေက ပန်းချီတွေရဲ့အပေါ်ကနေ ဆေးတွေ ထပ်ပိုးသုတ်ခဲ့တဲ့အတွက် မမြင်နိုင်တော့ပါဘူး။ ဒါပေမယ့် အုတ်နဲ့ဆောက်တဲ့ ပုဂံခေတ်က ရေတွင်းနဲ့ ကျောင်းကိုတော့ အခုတိုင် ဘုရားအနီးမှာ တွေ့နိုင်ပါသေးတယ်။

ဒီဘုရားကို ဇေယျသိင်ခ မင်းကြီးလက်ထက် ခရစ်နှစ် ၁၂၂၄ ခုနှစ်မှာ စစ်သူကြီးအမတ် အနန္တသူရနဲ့ အမတ်ကတော်တို့က တည်ဆောက်ပူဇော်တာ ဖြစ်ပါတယ်။ ကျောက်စာမှာ မြင့်မြတ်ပြီး အဖိုးမဖြတ်နိုင်တဲ့ ဝတ္ထုပစ္စည်းတွေကို ဌာပနာထားကြောင်း အလှူရှင်တွေက အသေးစိတ် ရေးထိုးထားပါတယ်။ ဒီဘုရားကို တည်ထားပူဇော်တဲ့အတွက် ဘဝ အသစ်အသစ် တဖန်ဖြစ်ရသော သံသရာစက်ကို ရပ်ပစ်နိုင်ရလိုကြောင်း သေနာပတိ အမတ်ကြီးနဲ့ အမတ်ကတော်တို့က ဆုတောင်းထားကြပါတယ်။